أداء : الممثلة أمل حويجة

أمل  حويجة ممثلة سورية مواليد 1962خريجة المعهد العالي للفنون المسرحية -1984عملت في المسرح كممثلة ومخرجة في سورياومعلمة في المسرح المدرسي  لعدة سنوات في الإمارات لها العديد من الكتب الموجهه إلى اليافعين من قصص قصيرة ومسرح“ آه يا عطر الليل- أمهاتنا في خطر- خطفني الديك- حب- هس..”  معروفة باسم ماوكلي والكابتن الماجد والعديد من أسماء الشخصيات الكرتونية التي قامت بأدائها صوتياً.تعمل حالياً على عدة مشاريع صوتية باسم ”  أصوات- وحكايات قبل النوم..”

بمبادرة طيبة من الممثلة أمل حويجة سننشر مجموعة قصص صوتية للاطفال نتمنى ان تحمل الفائدة والمتعة لأطفالكن/ م وان تكون احدى طرق العلاج النفسي للأطفال المتضررين من الزلزال .

نتمنى من كل سيدة لديها اطفال :

١- ان تهيئ ورقة وقلم والوان، اذا امكن، لكل طفل/ة قبل سماعه/ا القصة
2-وتطلب منه/ا بعد انتهاء سماعه/ا للقصة ان ت/يرسم ما سمعته/سمعه
3-بعد انتهاء الطفل من الرسم، نرجو منكن كتابة اسم الطفل/ة والعمر والمدينة المتواجد/ة فيها
4- تصوير اللوحة بكاميرا الموبايل وليس بعدسة الواتس أب
5-ارسال الصورة كمرفق الى الايميل التالي 👇🏻
Media.s.w.n@gmail.com
6-سيتم نشر كل قصة على حدة مع رسومات الأطفال في ملف ب. د. ف
7- سيتم نشر مجموعة قصص صوتية بصوت الفنانة أمل حويجة على موقع الشبكة ووسائل التواصل الاجتماعي
8- في نهاية المشروع سيتم جمع القصص المصورة في ملف واحد ويرسل الى أهالي المشاركات/ين
مع تمنياتنا بتجربة جميلة وممتعة بصحبة اطفالكن

القصة الأولى : كبكوبة ضو

أداء : الممثلة أمل حويجة

شارك في الأداء – شحادة الشهابي.

رسم اللوحة الطفل: جاد اوليفير روتيه

القصة مسموعة أدناه

كبكوبة ضو / القصة مكتوبة

في مجرة بعيدة كتير كتير..فيها كواكب وشموس وشمس وشموسة… شموسة حبية شمس.

 وبليلة عرسهم طلعوا يركضوا بها لفضا ، رمالها خيوط من ضو ورمتلو خيوط من ضو ، تشابكت هالخيطان وصارت كبكوبة ضو، ساطعة وحلوة ومبهرة كتير كتير وصار يطلع منها ألوان..

وكل ما ضحكوا وفرحو افيها أكتر كل ما كانت هي تلف وتدور  وتنط وتكرج قدامهم  و يلحقوها..

شافوهن رفقاتهن كواكب صغيرة..لحقوهم، وصاروا يصيحوا..:

-أزرق أخضر أحمر  أصفرأورنج لازورد أبيض

-خمري

وكرجت هالكبكوبة كرجت، كرجت وعيونهم تعبت دموع من سطوع الضو القوي وما انتبهوا انو ضيعوا الطريق.

 صار لازم يخففوا سطوعها أو ما عاد يطلعوا فيها حتى يقدروا يشوفوا الطريق وصاروا يدوروا على حل .

واحد من الكواكب الصغيرة قلن :

-انا عندي رمل 

في كوكب تاني قال:

 -عندي .. عندي  صخر، أنا ماعندي غير الصخر.

واحد قال:

 أنا عندي مي

 وواحد تالت قال:

– أنا عندي ريح،  عندي ريح قوية كتير

وكبكوبة الضو طلعت متل المغناطيس، شو ما جابولها تلقط و تاخد، أخدت التراب الصخر المي البحر المحيطات..

صاحت شموسة :

-شو هالكبكوبة الحلوة

قلا شمس:

– لا ، هاي مو كبكوبة يا شموسة هاي كوكب.

قالت :

-بدي سميها ، شو سميها ؟ فكرت شوي وصاحت:

-أرض

-أرض! أرض.

كوكب بياخد العقل ، المي والريح والتراب عملو زرع، صار في طيور ،عصافير ومن فرحها شموسة ما قدرت تخبي السر اللي جوات قلبها.

قربت من شمس وهمستلو ..قالتلو :

-انا حبلي رح يصير عنا ولاد..

 وطار من الفرح وصاح :

-ياااه

وردت وراه الكواكب:

 -ياه

رقصوا وغنوا وفرحوا ..ودبك دبكة قوية على هالأرض، لكن ما حس إلا انفجر فيها بركان ضو رهيب.

كنن نسيوا إنو هالكبكوبة كانت كبكوبة قلوبهن ومحبتهم ،هي فرحت بفرحهم واتفجر من فرحها بركان ضو.

خاف شمس كتير وقال:

-كلشي اشتغلناه رح يخرب بلحظة.

 وراح ليسكر هالبركان. نط ، لكن اتزحلط بالضو واتسكرت الجبال عليه.

اختفى شمس بباطن الأرض واختفى معاه حلم شموسة وشمس بالرجعة لمجرتهم لأنو ما عاد فيها تترك الأرض وحبيبها  محبوس فيها.

وصارت  الشمس تدور حوالين هالأرض والكواكب تدور حوالين هالشمس وكل ما تنام وتفيق  وتلاقي الأرض عم تدور تطمن انو شمس بخير وعم يدورها للأرض حتى يطمنها

وصار في شروق وغروب وصارت تصلي وتنادي كل يوم :

– شمس شمس ..

وبليلة مشتاقة خلفت شهب .

 في منهم ضاعوا بالفضا وشي منهم راح لعند ها لكواكب القريبة من أمهم وفي منهم نزلوا عالأرض، كبكوبة شمس وشموسة .

صاروا يسبحوا بالمي يلعبوا بالتراب يعمروا بيوتهم من طين.

 لانت أجسادهم صار الهم ضحكات حلوة وعيون حلوة

بعدت عن الأرض حتى ما تزعجهم بحرارتها.

تفاجئت ، صار عالأرض في ربيع وصيف وخريف وشتا ومع  الشتا و الغيوم كانت تبعت رسائل  كل يوم بلكي المطر ياخدها  لأعماق الأرض  وتوصل رسالتها لحبيبها شمس

ملايين السنين مرت وشموسة عم تبعت رسائل…

هي بتظن وأنا بظن انو ما وصلوا الرسائل لأنو الحبيب لسا لهلق كل ما اشتاق بهز أعماق الأرض.

شمس ما بيعرف انو صار عندو ولاد عالأرض وما بيعرف  إنو كل ماجن الصبر بقلبوا  ولادو هني اللي عم يتوجعوا ..

شموسة عم تفكر بدها حل… شو الحل يا ترى مع قصة هالحب هاي؟

وأنا وإنتو هلق عم نفكر بحل ..

والأولاد ولاد شمس وشموسة هدول أكيد رح يلاقوا حل ….  ولا شو؟

وهاي الحكاية حكيناها وبعبكن حطيناها

أمل حويجة

مارس-2023